Buch II VI. Ein widersang gottes in der sele an fúnf dingen

"Swenne ich schine, so mu^ost du lúhten;
swenne ich vlússe, so mu^ost du vúhten.
Swen du súfzest, so zúhest du min go^etlich herze in dich,
swenne du weinest na mir,
so nim ich dich an den aren min.
Swenne du aber minnest, so werden wir zwo^ei ein sin,
und swenne wir zwo^ei alsust ein sin,
so mag da niemer scheiden geschehen,
mer ein wunnenklich beiten
wonet zwúschent úns beiden."

"Herre, so beite ich denne mit hunger und mit durste,
mit jagen und mit luste
unz an die spilenden stunde,
das us dinem go^etlichen munde
vliessen die erwelten wort,
die von nieman sint gehort
mer von der sele alleine,
die sich von der erden enkleidet
und leit ir ore fúr dinen munt.
Ja die begriffet der minne funt!"

[widersang - Antwortgesang; luhten - leuchten; vlusse - fließe;
vuhten - feuchten, feucht werden; zuhest - ziehst;
an den aren min - in meinen Arm; beiten - Erwarten;
unz an die spilenden stunde - auf die beseligende Stunde;
begriffet der minne funt - greift der Liebe Fund und hält ihn fest]


_____

Buch II XI. Von siben hande liebin gottes


Dú rehte gotz minne het siben angenge:
Dú vro^eliche minne trit in den weg,
die vo^erhtende minne enpfat die arbeit,
dú starke minne mag vil tu^on,
dú minnende minne enpfat enkeinen ru^om,
dú wise minne hat bekantheit,
dú vrie minne lebet sunder herzeleit,
dú gewaltige minne ist iemer me gemeit.

[siben hande - sieben Formen; liebin gottes - Gottesliebe;
gotz minne - Gottesliebe; angenge - Art und Weise;
vo^erhtende - fürchtende; enpfat - empfangt;
ru^om - Ruhm; bekantheit - Erkenntnis; vrie - freie;
sunder - ohne; iemer me gemeit - allzeit freudig]

_____

Buch II XV. Wie der von minnen ist wunt, wirt gesunt


Swelch mensche wirt ze einer stunt
von warer minne reht wunt,
der wirt niemer me wol gesunt,
er enkússe noch den selben munt,
von dem sin sel ist worden wunt.

_____

Buch II XVII. Wie got vriet die sele und machet
si wise in siner liebin


Alsust vriet got die einvaltigen sele
und machet si wise in siner liebi:
"Eya liebú tube, din fu^esse sint rot,
din vedern sint eben,
din munt ist reht,
din o^vgen sint scho^ene,
din ho^vbet ist sleht,
din wandelunge ist lustlich,
din flug ist snel
und du bist alze snel zu^o der erde."

[vriet - freit; wise - weise; liebin - Liebe;
tube - Taube; vedern - Federn; eben - glatt;
reht - wohlgeformt; ho^vbet - Kopf; sleht - ebenmäßig;
wandelunge - Wandeln; ]

_____

Buch II XXIII. Wie dú minne vraget und leret die stumpfen selen
und brehte si gerne zuo irme liebe und sprichet allererst,
und dú stumpfe sele antwúrt


(...) "Eya, nu sage mir, wa sin wonunge si."

"Es ist enkein herre me,
der zemale in allen sinen húsern wone denne alleine er.
Er wonet in dem vride der heligen minnesamkeit
und runet mit siner liebin in dem engen eno^ete der sele,
er halset si o^vch in der edelen behagunge siner liebi,
er gru^esset si mit sinen lieplichen o^vgen,
wenne sich die lieben werlichen schowent,
er durkússet si mit sinem go^etlichen munde.
Eya wol dir, me denne wol der úberheren stunde!
Er trútet si mit voller maht
in dem bette der minne.
So kumt si in das ho^ehste wol
und in das minnenklicheste we,
wirt si sin rehte inne.
Eya liebú, nu la dich minnen
und were dich nit mit grimme." (...)

[sin wonunge si - seine Wohnung ist; zemale - zugleich;
vride - Friede; minnesamkeit - heilige Liebe;
runet - raunt, flüstert; eno^ete - (vertraute) Einsamkeit;
halset - umarmt; behagungen - edle Freude;
werlichen  schowent - sich unverstellt schauen, betrachten;
durkusset - küßt voller Innigkeit; uberherre stunde - allererhabenste Stunde;
trutet mit voller maht - liebt mit aller Kraft;
wol - Wohl, we - Weh; ]

_____

Buch II XXV. Von der klage der minnenden sele, wie ir got schonot
und enzihet sine gabe. Von wisheit, wie dú sele
vraget got, wie ir si und wa er si.
Von dem bo^vmgarten, von den blu^omen
und von dem sange der megde


"O du unzalhaftiger schatz an diner richeit!
O du unbegriffenliches wunder an diner manigvaltekeit!
O du endelosú ere in der herschaft diner edelkeit!
Wie we mir denne na dir si,
als du wilt schonen min,
das mo^ehten dir alle creaturen nit vollesagen,
ob si mu^esten fúr mich clagen,
wan ich lide unmenschliche not;
mir were vil sanfter ein menschlich tot.

Ich su^oche dich mit gedanken
als ein juncfro^vwe verholn ir liep.
Des mu^os ich sere kranken,
wan ich mit dir gebunden bin;
das bant ist starker denne ich si,
des mag ich nit werden von minnen vri.
Ich ru^effe dir mit grosser gere
in ellendiger stimme,
ich beiten din mit herzen swer,
ich mag nit ru^owen, ich brinne
unverloschen in diner heissen minne.
Ich jage dich mit aller maht;
hette ich eines risen kraft -
dú were schiere von mir verlorn,
keme ich recht na dir uf das spor.

Eya lieber, nu lo^vfe mir nit ze lange vor
und ru^owe ein wenig minnenklich,
uf das ich dich begriffe.

Eya herre, als du mir hast alles enzogen, das ich von dir han,
so la mir doch von gnade die selben gabe,
die du von nature einem hunde hast gegeben,
das ist, das ich dir getrúwe si in miner not
ane allerleie verdrutz;
des gere ich sicherlich
serer denne des himmelriches."

"Liebú tube, nu ho^ere mich!
Min go^etlichú wisheit ist so sere úber dir,
das ich alle min gabe an dir also ordene,
als du si an dinem armen libe maht getragen.
Din heimliches su^ochen mu^os mich vinden,
dines herzen jamer mag mich twingen,
din su^esses jagen machet mich so mu^ede,
das ich begere, das ich mich ku^ele
in der reinen sele din,
da ich in gebunden bin.

Dines seren herzen súfzen unde biben
hat min gerehtekeit von dir vertriben.
Das ist vil rehte dir als mir:
ich mag nit eine von dir sin!

Wie wite wir geteilet sin -
wir mo^egen doch nit gescheiden sin.
Ich kan dich nit so kleine beriben:
Ich tu^o dir unmassen we an dinem armen libe.
So^elte ich mich dir ze allen ziten geben nach diner ger,
so mu^este ich miner su^essen herbergen
in dem ertrich an dir enbern,
wan tusent lichamen mo^ehtin nit einer minnenden sele
ire ger vollewern.
Darumbe ie hoher minne, ie heliger marterer."

"O herre, du schonest alze sere mines pfu^oligen kerkers,
da ich inne trinke der welte wasser
und isse mit grosser jamerkeit
den escheku^ochen miner bro^edekeit:
Und ich bin gewundet uf den tot
mit diner fúrigen minne strale;
nu lastu mich, herre, ligen
ungesalbet in grosser qwale."

"Herzeliebú, min kúnegine,
wie lange wiltu also ungedultig sin?
Wenne ich dich allerserost wunden,
so salben ich dich allerminneklichost in der selben stunde.
Die gro^essi mines richtu^omes ist alleine din
und úber mich selber soltu gewaltig sin.

Ich bin dir innenklichen holt;
hastu das gelo^ete - ich habe das golt.
Alles, das du hast dur mich getan, gelassen und gelitten,
das wil ich dir alles widerwegen
und wil dir mich selben eweklich vergeben
nach allem dinem willen geben."

"Herre, ich wil dich zweiger dinge vragen,
der berihte mich nach dinen gnaden:
wenne min o^vgen trurent ellendekliche
und min munt swiget einvalteklich
und min zunge ist mit jamer gebunden
und min sinne mich vragent von stunden ze stunde,
was mir sie, so ist mir,
herre, alles nach dir.

Wenne min fleisch mir entvallet,
min blu^ot vertrukent, min gebein kellet,
min adern krimpfent
und min herze smilzet nach diner minne
und min sele brimmet
mit eines hungerigen lo^ewen stimme,
wie mir denne si
und wa du denne bist,
vil lieber, das sage mir."

"Dir ist als einer núwen brut,
der sclafende ist engangen ir einig trut,
zu^o dem si sich mit allen trúwen hat geneiget,
und mag des nit erliden, das er ein stunde von ir scheide.

Alse si denne erwachet, so mag si sin nit me haben
denne alse vil als si in irem sinne mag getragen;
da von hebet sich alle ir clage.
Die wile das dem jungeling sin brut ist nit heim gegeben,
so mu^os si dike ein von im wesen.

Ich kum zu^o dir nach miner lust, wenne ich wil;
siestu gezogen und stille
- und verbirg dinen kumber, wa du maht! -,
so meret an dir der minne kraft.

Nu sage ich dir, wa ich denne si:
Ich bin in mir selben an allen stetten und in allen dingen
als ich ie was sunder beginnen
und ich warten din in dem bo^vmgarten der minne
und briche dir die blu^omen der su^essen einunge
und machen dir da ein bette von dem lustlichen grase
der heligen bekantheit;
und dú liehte sunne miner ewigen gotheit
beschinet dich mit dem verborgenen wunder miner lustlicheit,
des du ein wenig heimlich hast erzo^eget,
und da neige ich dir den ho^ehsten bo^vm
miner heligen drivaltekeit.

So brichestu denne die gru^enen, wissen, roten o^eppfel
miner saftigen menscheit
und so beschirmet dich der schatte
mines heligen geistes
vor aller irdenscher trurekeit;
so kanstu nit gedenken an din herzeleit.
So du den bo^vm umbevahest,
denne lere ich dich der megde sang,
die wise, dú wort, den su^essen klang,
den die jene an inen selben nút múgen verstan,
die mit der unkúscheit sint durgan;
sie so^ellent doch su^essen wandel han.
Liebú, nu sing an und la ho^eren, wie du es kanst."

"Owe min vil lieber, ich bin heiser in der kelen miner kúscheit;
mere das zuker diner su^essen miltekeit
hat min kelen erschellet, das ich nu singen mag alsust:
'Herre, din blu^ot und min ist ein, unbewollen -
din minne und minú ist ein, ungeteilet -
din kleit und min ist ein, unbevleket -
din munt und min ist ein, ungekust - etc.'"

Dis sint dú wort des sanges.
Der minne stimme und der su^esse herzeklang
mu^esse bliben,
wan das mag kein irdenschú hant geschriben!

[unzalhaftiger - unermeßlicher; richeit - Reichtum, Fülle;
edelkeit - Herrlichkeit; ich lide - ich leide;
mit gedenken - mit Gedanken; verholn - verstohlen; ir liep - ihren Liebsten;
bant - Band; von minnen vri - von Liebe frei;
gere - Sehnsucht; beiten - warten; ich brinne - ich brenne;
rise - Riese; das spor - die Spur; dich begriffe - dich fassen kann;
getruwe si - getreu sein; widertrutz - Aufbegehren;
tube - Taube; ordene - zuteile; twingen - zwingen;
ku^ele - kühle; dines seren herzen - deines wunden Herzens;
eine von dir sin - ohne dich sein; wite - weit; kleine beriben - zärtlich berühren;
ertrich - Erde; lichamen - Leib; vollewern - vollkommen stillen;
pfu^oligen kerkers - modrigen Kerkers;
escheku^ochen - Aschenkuchen; bro^edekeit - Hinfälligkeit;
 gewundet - verwundet; furigen - feurigen;
qwale - Qual; allerserost - am allerschmerzlichsten;
allerminneklichost - am allerliebevollsten;
gelo^ete - Waage; widerwegen - aufwiegen;
zweiger dinger vragen - zwei Dinge fragen;
trurent - trauern; swiget - schweigt; min gebein kellet - mein Gebein schmerzt;
brimmet - brüllt; nuwen brut - frisch verlobte Braut;
ir einig trut - ihr einzig Geliebter;
truwen - Treue; getragen - ertragen; wile - Weile;
siestu - bist du; trurekeit - Traurigkeit;
umbevahest - umfängst; die wise - die Weise;
unbewollen - unverdorben; muesse bliben - müssen  (unausgedrückt) bleiben]


_____

Buch III II. Wie dú sele lobet got an siben dingen und got si.
Von der salbe und beite


"O su^esser Jhesus, allerscho^eneste forme,
unverborgen in no^eten und in liebe miner ellenden sele!
Ich lobe dich mit dir selben in der minne,
in no^eten und in liebe mit der gemeinschaft aller creaturen,
des lustet mich denne ob allen dingen.

Herre, du bist die sunne aller o^vgen,
du bist der lust aller oren,
du bist dú stimme aller worten,
du bist dú kraft aller vromekeit,
du bist dú lere aller wisheit,
du bist das lip in allem lebende,
du bist dú ordenunge alles wesendes!"

Do lobte got die minnende sele loblich,
des luste in su^esseklich alsust:
"Du bist ein lieht vor minen o^vgen,
du bist ein lire vor minen oren,
du bist ein stimme miner worten,
du bist ein meinunge miner vromekeit,
du bist ein ere miner wisheit,
du bist ein lip in minem lebende,
du bist ein lop in minem wesende!"

"Herre, du bist ze allen ziten minnensiech na mir,
das hast du wol bewiset an dir.
Du hast mich geschriben an din bu^och der gotheit,
du hast mich gemalet an diner mo^enscheit,
du hast mich gegraben an diner siten, an henden und an fu^essen.
Eya, erlo^vbe mir, vil lieber, das ich dich salben mu^esse."

"Ja, wa wo^eltistu die salben nemmen, herzeliebe?"

"Herre, ich wolte miner sele herze inzwo^ei rissen
und wo^elte dich dar in legen."

"So mo^ehtest du mir niemer so liebe salben gegeben,
als das ich ane underlas in diner sele mu^este sweben."

"Herre, wo^eltest du mich mit dir ze huse nemen,
so wo^elte ich iemer me din arcedinne wesen."

"Ja, ich wil, iedoch min trúwe heisset dich beiten,
min minne heisset dich arbeiten,
min gedult heisset dich swigen,
min kumber heisset dich armu^ot liden,
min smahheit heisset dich vertragen,
min genu^egen heisset dich note clagen,
min sig heisset dich an allen tugenden vollevarn,
min ende heisset dich viele tragen;
des hast du ere, swenne ich dinen grossen last entlade."

[forme - Urbild; des lustet mich - es erfreut mich;
lere - Lehre; lip - Leben; wesendes - Seiendes;
lieht - Licht; lire - Leier;
meinunge miner vromekeit - Wille für meine Vortrefflichkeit;
lop - Lob; minnesiech - liebeskrank;
inzwoi rissen - auseinanderreißen;
ze huse - nach Hause; arvedinne - Ärztin;
truwe - Treue; beiten - ausharren, warten;
swigen - schweigen; liden - leiden; smahheit - Schmach, Erniedrigung;
note clagen - selten klagen; vollevarn - zur Vollendung bringen]

_____

Buch III V. Wie dú sele klaget, das si keine messe noch die zit
ho^eret, und wie got si lobet an zehen dingen

(...)
Do sprach der minnekliche munt, der mine sele
hat durwunt mit sinen grossen worten,
die ich nie wirdige horte, alsust:

" Du bist miner gerunge ein minnenvu^olunge,
du bist miner brust ein su^essú ku^olunge,
du bist ein kreftig kus mines mundes,
du bist ein vro^elich vro^ede mines vundes!
Ich bin in dir und du bist in mir,
wir mo^egen nit naher sin,
wan wir zwo^ei sin in ein gevlossen
und sin in ein forme gegossen.
Also son wir bliben eweklich unverdrossen."
(...)

[durwunt - verwundet (hat); nie wirdige - (ich) Unwürdige;
gerunge - Begehren; minnevu^olunge - Liebesfühlen;
ku^olunge - Kühlung; mines vundes - meines Fundes;
unverdrossen - unermüdet]

_____

Buch III XI. Zwúschent got und der minnenden sele
sint allú ding scho^ene


Wenne die minnende sele sihet in den ewigen spiegel,
so sprichet si:

"Herre, zwúschent dir und mir sint
alle ding scho^ene; (...)"

_____

Buch III XIII. Von sehtzehen hande minne


Dú milte minne von heliger barmherzekeit
vertribet ital ere und bo^esen krankheit.

Dú ware minne von gotlicher wisheit
bringet genu^egunge und vertribet die unlobliche girheit.

Dú diemu^etigú minne von heliger einvaltekeit
gesiget alleine úber die hoffart und bringet die sele
mit gewalt in helige ware bekantheit.

Die stete minne von gu^oten siten
mag keiner valscheit gepflegen.

Dú grosse minne von ku^ener getat
weis ir in allen dingen gu^oten rat.

Dú bevintlich minne von gotes heimlicheit
verblendet dis ertrich sunder arbeit.

Dú gebunden minne von heliger gewonheit
dú ru^owet niemer und lebt doch in ir selber sunder arbeit.

Dú ingende minne von grosser úberflu^ot
dú liget alles stille und ir sint allú ding bitter
sunder alleine got.

Dú ru^effende minne von edeler ungedult
dú swiget niemer und si hat seleklich vergessen aller schult.

Dú dútesche minne von gotz lere
dú bo^eget sich noch zu^o einem kinde vil gerne.

Dú scho^ene minne von hoher gewalt
dú jungert die sele, und der lip wirt alt.

Dú minnekliche minne von offener gabe
verdilget des suren herzen clage.

Dú gewaltig minne von richer koste
hat in gotte die su^esseste lust.

Dú verborgen minne treit túren schatz
von gu^otem willen in heliger tat.

Dú clare minne von spilender flu^ot tu^ot der sele su^esse not,
si to^edet si o^vch sunder tot.

Dú windesche minne von úbermaht,
das ist dú nieman gedúten mag.

[ital ere - eitle Ehrsucht; genu^egunge - Genügsamkeit;
girheit - Gier; ware bekantheit - wahre Erkenntnis;
von ku^ener getat - von kühner Tat; bevintlich - erkennende;
ingende - eingehende; uberflu^ot - überstömende;
dutesche minne - die erklärende Liebe;
jungert - verjüngt; des suren herzen clage - des bitteren Herzens Klage;
von richer koste - die sich verausgabt;
treit turen schatz - trägt einen kostbaren Schatz;
windesche minne - stürmende Liebe; geduten - deuten, erklären]

_____

Buch III XXIII. Die kraft der gerunge benimet die wort;
jungfrowen mag got nit enbern;
gotz angesiht, sin umbevahen und sin lust
úbewinden tusent to^ede

Swer do brant in der creftigen minne fúr,
der mag des nit erliden,
das er sich mit den súnden iergen ergliche ku^ele.

"Eya vil lieber, wenne sol dich des lusten,
des mich lustet?"
Alsust sprach ein ellendige sele.

Do antwúrt ir der vil liebe und sprach
als er nit wiste, was si wo^elte:
"Wes lustet dich?"

Do sprach si aber:
"Herr, dú kraft der gerunge hat mir benomen
die stimme der worten."

Do sprach er:
"Die juncfro^vwen koennent nit wol vrien,
wan ir schemme ist von nature edel."

Do klagte si:
"Owe herre, joch bist du mir alze lange vro^emde!
Ko^ende ich dich, herre, mit zo^vfere gewinnen,
das du nit mo^ehtest geru^owen denn an mir!
Eya, so gienge es an ein minnen!
So mu^estest du mich denne bitten,
das ich fu^ere mit sinnen!"

Do antwúrt er und sprach alsust:
"O du unbewollen tube,
go^enne mir des, das ich dich mu^esse sparen;
dis ertrich mag din noch nit enbern."

Do sprach si:
"Eya herre, mo^ehte mir das ze einer stunt geschehen,
das ich dich nach mines herzen wúnsche
mo^ehte angesehen
und mit armen umbevahen
und din go^etlichen minnelúste
mu^esten dur mine sele gan,
als es doch menschen in ertrich mag geschehen!
Was ich da nach liden wo^elte,
das wart nie von menschen o^vgen gesehen -
ja, tusent to^ede weren ze lihte.
Mir ist, herre, nach dir also we!
Nu wil ich in der trúwe stan;
maht du es, herre, erliden,
so las mich lange jamerig nach dir gan.
Ich weis das wol:
Dich mu^os doch, herre,
der erste lust nach mir bestan."

[gerunge - Begehren; enbern - entbehren; umbevahen - Umarmen;
swer do brant - wer brannte; fur - Feuer; ergliche - verwerfliche;
ku^ele - abkühlt; vrien - freien; scheme - Scheu;
zo^vfere - Zauber; das ich fu^ere mit sinnen - dass ich Maß halte;
unbewollen tube - unbefleckte Taube; in der truwe stan - in Treue ausharren;
lust nach mir bestan - die Lust nach mir überkommen]

_____

Buch III XXIV. Zweierleie geistlichen lúten wirt gebotten
zweigerleie geist von got und von dem túfel.
Von siben hande minne

(...)
Die getrúwe minne hat zu^o gotte ein stete lop,
die gerende minne tu^ot dem reinen herzen vil manig su^esse not,
die su^ochende minne ist ir selbes alleine,
die bekante minne git sich allen creaturen gemeine,
die lútende minne ist noch gemenget mit trurekeit,
dú swigende minne gebruchet sunder arbeit.
O, was si stille werket, das es der licham nit enweis!
Dú luter minne ist in got alleine stille,
wan si habent beide einen willen,
und ist enkeine creature so edele,
die si mo^ege hindern.
(...)

[hande - Formen; getruwe - getreue; lop - Lob;
gerende - begehrende, sehsüchtige; bekante - erkennende;
git sich - gibt sich; lutende - rufende; trurekeit - Traurigkeit;
swigende - schweigende; gebruchet - genießt; licham - Leib;
luter minne - lautere Liebe]

_____

Buch IV XVI. Die grosse minne hat me denne zehen stuke
und von zweiger hande clage


Hie nach hat dú grosse minne ir nature:
Si vlússet nit mit trehnen,
mere si brennet in dem grossen himmelfúre;
da inne vlússet si allerverrost
und stat doch in ir selber allerstillost;
si stiget gotte allernehest
und blibet an ir selben allerinnest;
si begriffet allermeist
und behaltet allerminst.

"O allerseligostú minne,
wa sint die, die dich bekennen?"
"Si sint gentzlich verbrant
in der heligen drivaltekeit,
si wonent nit in in selber.
Dise seligen mo^egent niemer vallen in ho^vbtsúnde."

"Warumbe?"

"Si sint mit gotte durvlossen
und umbevangen so sere,
ie me si besu^ochet werden,
ie starker si werdent."

"Warumbe?"

"Ie langer si hie sint in dem strite und minnent,
ie edeler si got dunket
und ie sno^eder  und unseliger
si sich selben dunkent."

"Warumbe?"

"Ie heliger minne, ie grosser angst,
und ie maniger trost,
ie steter vorhte.
Aber dú minnonde sele mag nit grúwelichen vúrhten,
mere si vo^erhtet edellich."
(...)

[me denne zehen stuke - mehr als zehn Eigenschaften;
mere si brennet - vielmehr brennt sie; himmelfure - Himmelsfeuer;
allerverrost - in die größte Ferne; wa sint die - wie sind die;
ie edeler si got dunket - desto edler erscheint ihnen Gott;
ie maniger trost - je häufiger der Trost; vorhte - Furcht, Angst;
die minnonde sele - die liebende Seele;
gruwelichen vurhten - grauenvolle Angst;
mere si vo^erhtet edellich - empfindet edle Scheu]

_____

Buch IV XIX. Das ambaht der gebenedigten minne
ist manigvalt


O gebenedicte minne,
das was sunder beginne din ambaht
und ist noch,
das du got und des menschen sele
zesamene bindest.
Das sol din ambaht sunder ende sin.
Gegru^esset siestu, vro^vwe min,
und beware, das ich nit klage
mime scho^enen herren úber dich.
Wil er ze lange von mir sin,
so erfrúre ich ze sere:
das beware, herzefro^vwe kúnegin.
Du hast mich in gotte verleitet,
das ich seleklich gebunden bin.

O minne, vro^vwe, hilf du mir,
das ich an sinem arme verscheide,
da ich mit ime bevangen bin.
Iedoch wil ich gerne
liden des todes pine
an dem súndigen lichamen min.

Minne, du hast den gro^essosten gewalt
vor allen tugenden iemer me;
des wil ich gotte iemer danken.
Du benimest mir manig herzensere.
Ich habe enkein tugende mere,
er diener mir mit den tugenden sin.
Das were mir swerer denn der tot,
das ich iht gu^otes mo^ehte getu^on
sunder den herren min.
(...)

[ambaht - Aufgabe; das was sunder beginne - das war vor aller Zeit;
zesamene - zusammen; mime - meinem; so erfrure ich - ich würde erfrieren;
mit ime bevangen bin - von ihm eingehüllt bin; pine - Pein;
lichamen - Leib; herzensere - Herzeleid; er diener mir - er dient mir (mit);
iht - etwas]

_____

Buch V XXX. Von zwenzig kreften gottes minne
und von manigvaltigen nammen


Eya liebú gotz minne,
behalse ie die sele min,
wan es múrdete mich ob allem we,
solte ich wesen von dir vri!

Eia minne, nu la mich nit erku^elen;
minú werk sint allú tot,
so ich dich nit vu^ele!

O minne, du machest su^esse pine und not,
du gibest lere und trost
den waren gottes kinden.

O minnebant! Din su^essú hant hat den gewalt,
si bindet beide jung und alt.

O minne, du machest grosse burdin lichte,
und kleinú súnde dunket dich swere;
du dienest gerne sunder lon
allen creaturen undertan.

Eya su^essú gotz minne,
swenne ich alze lange sclaffe
an versumekeit gu^oter dingen,
so tu^o wol und wekke mich
und singe mir, vrowe, dinen sang,
da du die sele mitte ru^erest als ein su^esse seitenklang.

Eya minne vrowe,
wirf mich under dich,
ich wurde vil gerne sigelos!
Das du mir denne benemist dis leben,
dar an lit, vrowe, aller min trost.

Owe miltú gotz minne,
du schonest min alze sere,
das clage ich iemer mere.

Minne, din vil edle gru^os
der hat erfúllet minen mu^ot.
Minne, din vil reine quelen tu^ot
mich ane súnden leben.
Minne, dinú stetú andaht hat mich
in also su^essen kumber braht.

O go^etlichú minne,
wie sol ich din mit gedult enbern,
so du mir wilt vro^emde sin.

Minne, das ist ein wunneklich himmelsch homu^ot,
das mir din vro^emdi wol tu^ot.

O wunderlichú minne,
wol selig der iemer, den du lerst;
das ist sin wunneklichestú diemu^etekeit,
das er, vro^vwe, dich es bittet,
das du von ime kerest.

Eya minne, wie kleine du der vindest,
die dich mit aller maht in allen dingen su^ochent
und mit stetem vlisse din gebruchent,
und die dich in minneklicher gere heissent,
das du von inen vliehest.
Der ist aber vil,
die dir mit dem munde ru^effent
und mit den werken von dir kerent.

Minne, din scheiden und din komen
das ist gliche willekomen der wol geordeneten sele.

Minne, du hast alles das wunder getan,
das got hat mit úns begangen
in herzeklicher liebi.

Minne, din vil edelú luterkeit,
dú als ein scho^ene spiegel
stat vor gotte an der kúschen sele,
die machet heissen minnelust
in der magetlichen brust
zu^o Jhesu, irme lieben.
Die sere minnen unde megde sint,
das sint die jungvrowan von Seraphin.

Minne, din helig barmherzekeit
dú tu^ot den túfelen manig leit.
Minne, din vil su^esse vride bringet senfte gemu^ete
und reine sitten.

Minne, din heligu genu^egunge
machet vri gemu^ete
in willeclichem aremu^ete.

Minne, din warú durnehtekeit
dú claget nit gerne missekemi
noch arbeit.

[gotz minne - Gottesliebe; behalse - umfange;
murdete mich - (es) würde mich martern; vri - frei; vu^elen - fühlen;
pine - Pein; grosse burdin lichte - grosse Bürden leicht;
sclaffe - schlafe; versumekeit - versäumen;
sigelos - sieglos, unterliegen;
dar an lit aller min trost - darin besteht all meine Hoffnung;
miltu gotz minne - großzügige Gottesliebe;
wunneklich himmelsch homu^ot - wonnigliches himmlisches Hochgefühl;
wie kleine du der vindest - wie wenige du (von solchen) findest;
edelu luterkeit - edle Lauterkeit; tufel - Teufel;
warú durnehtekeit - wahre Vollkommenheit; missekemi - Unannehmlichkeit]

_____

Buch V XXXI. Von zehen creften der minne,
und das kein creature mag vol gedenken
der selen gerunge ze gotte


O minne, wie breit wirt din lieht in der sele
und wie vúrig ist din schin
und wie unbegrifflich ist din wunder
und wie manigvalt ist din wisheit
und wie snel ist din gabe
und wie kreftig ist din bant
und wie durnehtig ist din wesen
und wie senfte ist din vlus
und wie gros ist din koste
und wie getrúwe ist din arbeit
und wie helig ist din underscheidenheit!

Alse du die selen mit allen disen dingen durchvarest
und si denn sich ufhabet
und beginnet vliegen mit tubenvedern,
das ist mit allen tugenden,
und beginnet denne ze gerende
mit des aren girheit,
so volget si der hitze ufze himmele,
wan es dunket si alles kalt und ungesalzen,
das zergenglich ist.

So spriche ich uz dem munde der warheit alsus:
" Herre, die gerunge die ich zu^o dir habe in dinem zuge,
herre, die wisheit die ich denne enpfan in der minne vluge,
herre, die einunge die ich denne begriffe in dinem willen,
herre, die stetekeit die ich denne behalte nach diner gabe,
herre, die su^essú gehúgnisse als ich din gedenke,
herre, die verwenete minne, die ich zu^o dir habe,
die ist in ir selben also rich
und vor dinen gotz o^vgen also gros,
eb du es nit wistest, herre,
so mo^ehten es nit allú santko^erner,
alle wassertropfen,
alles gras und lo^vp, stein und holz,
alle toten creaturen,
da zu^o alle lebenden creaturen:
vische, vogele, tier, wúrme,
vliegende und kriechende,
túfel, heiden, juden und alle dine viende,
noch me: alle dine vrúnde, menschen, engel, heligen;
nu, eb alle die personen sprechen ko^enden,
wolten und rieffen ane underlas
untz an den jungesten tag, werlich herre,
das weistu wol, si mo^ehtin dir nit halp gekúndigen
die meinunge miner gerunge
und die not miner quelunge
und das jagen mines herzen
und das ufruken miner sele
nach dem smake diner salben
und dem ungescheidenen anhangen ane underlas."

"Ja Maria vrowe, gottes mu^otter,
wie solte es dir ergan,
eb du begondest mit dinem sune ze kúndende
der ewigen gotheit die liebi,
die ein vereinitú sele ane valsch
in disem libe in der ewigen gotheit hat,
und das ru^eren, da mit er si trútet;
vrowe, du mo^ehtist mu^ede werden
und din sun mu^este amehtig werden,
wan der go^etlichen minne vúrigú kraft gat
úber alle menschliche maht."

[lieht - Licht; vurig - feurig; durnehtig - vollkommen;
din Koste - dein Aufwand; underscheidenheit - Unterscheiden, Urteil;
ufhabet - sich emporheben; mit tubenvedern - mit Taubenflügeln;
zu gerende - zu begehren; zergenglich - vergänglich;
enpfan - empfange; die su^essú gehúgnisse - die süsse Erinnerung;
die verwenete minne - die zärtliche Liebe; viende - Feinde;
vrunde - Freunde; werlich - wahrlich;ufruken - Emporzucken;
nach dem smake - nach dem Duft;
da mit er si trútet - mit der er sie liebkost; amehtig - ohnmächtig;
vurigi kraft - feurige Kraft; gat - geht (übersteigt)]

_____

 

Alle Gedichte aus:
Offenbarungen der Schwester Mechthild von Magdeburg oder Das fließende Licht der Gottheit: aus der einzigen Handschrift des Stiftes Einsiedeln. Herausgegeben von P. Gall Morel Regensburg 1869
 

Biographie:

http://de.wikipedia.org/wiki/Mechthild_von_Magdeburg